قصة قديمه اضحك من قلبك

يحيا العدل
مجاهد طلع السوق يبيع البقرة، وهو ماشى جنب الدرة ساحب البقرة من الحبل؛ طلع عليه واحد مسك منه الحبل وسأله:
"إنت رايح فين؟"
مجاهد قال:
"وانت مالك، سيب حبل البقرة"
الراجل قال:
"مش سايب حبل البقرة إلا لما تقول لى: إنت رايح فين؟"
مجاهد قال:
"استغفر الله العظيم، رايح السوق، سيب بقى حبل البقرة."
الراجل قال:
"رايح السوق تعمل إيه؟"
مجاهد قال:
"إنت مالك، أعمل إيه ولا ماعملش إيه؟ هوه انت وصى عليه؟ سيب حبل البقرة"
الراجل قال:
"مش سايب حبل البقرة غير لما تقوللى انت رايح السوق تعمل إيه؟"
مجاهد قال:
"اللهم طولك ياروح، رايح السوق أبيع البقرة، إوعى بقى سيب حبل البقرة."
الراجل قال:
"ولما تبيع البقرة حاتجيب لى إيه؟"
مجاهد قال:
"وأنا ليه أجيب لك والا أوديلك؟ سيب ياراجل حبل البقرة"
الراجل قال:
"مش سايب حبل البقرة غير لما تقول لى حاتجيب لى إيه لما تبيع البقرة."
مجاهد قال:
"لاحول ولا قوة إلا بالله. ها جيب لك علبة سجاير، مبسوط ياسيدى؟ سيب بقى حبل البقرة."
الراجل قال:
"طيب؛ أنا فاضل معايا أربع سجاير؛ هاديلك نص اللى معايا. إنت تاخد سيجارتين، وانا سيجارتين."
مجاهد قال:
"متشكر، مش بادخن، سيب بقى حبل البقرة."
الراجل قال:
"مش سايب حبل البقرة لحد ماتاخد نص اللى معايا."
مجاهد قال:
"أمرى لله، هات السيجارتين، سيب بقى حبل البقرة."

أخد مجاهد السيجارتين، والراجل ساب حبل البقرة، ومشى مجاهد لغاية ماوصل السوق، وباع البقرة، واشترى علبة سجاير للراجل. وهوه راجع طلع عليه الراجل، وراح ماسكه من هدومه. وسأله:
"بعت البقرة بكام؟"
مجاهد قال:
"وانت مالك؟ سيب هدومى."
الراجل قال:
"مش سايب هدومك غير لما تقل لى بعت البقرة بكام."
مجاهد قال:
"أمرى لله؛ بعتها بميت جنيه، سيب بقى هدومى."
الراجل قال:
"النص بالنص؛ مش أنا اديتك نص اللى معايا؟ هات بقى النص."
مجاهد قال:
"نص إيه ياراجل يامجنون؟ خد علبة السجاير أهيه. سيب هدومى بقى."
الراجل قال:
"بقى أنا أديلك نص اللى معايا؛ وانت تدينى علبة سجاير؟ ياتجيب خمسين جنيه؛ با إما مش ها اسيبك إلا عند القاضى."
مجاهد قال:
"انت مجنون ياراجل انت؟ ياللا بينا على القاضى."
الراجل فضل ساحب مجاهد من هدومه، ودخل بيه فى الدرة، وفضلو ماشيين على جسر صغير لغاية ماحصلو وسعاية؛ قاعد فيها واحد لابس قاضى وحواليه ناس لابسين زى الحرس والنواطير. وأول ماوصلوا؛ الحرس راحو ماسكين مجاهد من إيديه الاتنين، وبعد شوية الحاجب زعق وقال:
"محكمة.."
وسكتت كل الأصوات مرة واحدة، والراجل اتقدم على القاضى وقال له:
"ياسيدى القاضى؛ الراجل ده قليل الأصل؛ إديته نص اللى معايا لما ماكانش معاه، وعاوز يدينى علبة سجاير وهوه معاه ميت جنيه."
القاضى قال للحرس:
"امسكوه لغاية مانفصل فى أمره"
الحرس قيدو مجاهد وربطو إيديه فى رجليه، وحطوه قدام القاضى. القاضى سأله:
"تنكر اللى الراجل الطيب الكريم ده بيقوله؟"
مجاهد حاول يحكى الحدوته، لكن القاضى سكــّته وقال له:
"جاوب على قد السؤال."
مجاهد قال:
"بس هوه ادانى سيجارتين بالعافية وانا ما بادخنش!"
القاضى قال:
"جاوب على قد السؤال"
مجاهد قال:
"بس أنا بعت البقرة بتاعتى مش بتاعته!"
القاضى قال:
"جاوب على قد السؤال"
مجاهد قال:
"بس أنا ياسيدى القاضى.."
القاضى قال:
"حكمت المحكمة بتغريم المتهم ميتين جنيه بسبب قلة أصله، وسداد مبلغ خمسين جنيه للراجل الطيب، وحبسه سنتين"
مجاهد حاول يفلفص من القيود ويزعق، لكن الحرس ضربوه لحد ماسكت، وسأل النواطير:
"دلونى ياولاد الحلال! أعمل إيه دى الوقت؟"
ريس النواطير قال له:
"مافيش غير انك تشوف واحد محامى يعمل لك استئناف قبل مانوديك السجن."
سأله مجاهد:
"يعنى إيه لامؤاخذه استئناف؟"
الريس قال له:
"هوه احنا فاتحين مدرسة والا محكمة؟ ماتسألش فى اللى مالكش فيه، دى حاجات نفهمها احنا."
مجاهد قال:
"أمرى لله، طب فين المحامى اللى حايعمل الاستئناف؟"
الريس قال:
"أهو جاى أهوه."
وجه واحد كان واقف ساكت طول الجلسه، مجاهد قال له:
"اعمل معروف يا أستاذ تعمل لى لا مؤاخذه استئناف فى المصيبة اللى أنا فيها دى!"
المحامى قال له:
"وماله، آخد منك ميت جنيه."
مجاهد قال:
"يا أستاذ اعمل معروف؛ ما احتكمش على ميت جنيه."
المحامى قال:
"انت راجل طيب، ها أخليهم خمسين بس"
مجاهد قال:
"زى بعضه، بس بلاش حكاية الحبس دى"
المحامى قال:
"ربنا يسهل بس ادعى لنا."
قعد مجاهد يدعى يدعى بكل قلبه ان ربنا يوفق المحامى فى الاستئناف، وراح المحامى قعد قدام القاضى يتكلمو سوا بصوت واطى، لكن كانو قاعدين يشاورو عليه وعلى الراجل اللى طلع له من الدرة، وبعد مدة المحكمة زاطت شوية وبعدين الحاجب زعق وقال:
"محكمة.."
سكتت المحكمة كلها مرة واحدة، ومجاهد قلبه وقع فى رجليه. والقاضى قال:
"نظرت عدالة المحكمة فى الاستئناف. وحكمت باعفاء المتهم من السجن والغرامة، على أن يسدد خمسين جنيه للراجل الطيب، ويدفع أتعاب المحامى وتكاليف الحرس"
مجاهد قال:
"ياسيدى القاضى؛ ماعادشى حيلتى غير هدومى؛ هادفع تكاليف الحرس منين؟"
ريس الحرس قال:
"إحنا غلابه زيك، كفاية علينا الهدوم"
مجاهد قلع هدومه واداها للحرس، وطلع من الدرة عريان ملط وهوه بيهتف:
"يحيا العدل... يحيا العدل."

» اضحك من قلبك .. غباء من القمة ..
» قصة الاستاذ ابو العريف اضحك من قلبك
» نكت على القذافي - تعالى اضحك
» كلمات تبقى فى قلبك
» افتح قلبك للدنيا